كوبرى شارع السودان السحلمى !ـ

published at:11/30/2009, Safsata :), Funny,
published by: she7ata

كل الناس بتسأل اية السحلمى ده، و ده شىء طبيعى، السحلمى ده تعبير مستجد يدل الى الشىء الا حدودى والمفروض انك مش مفروض تفهمة بس مخك بيترجمة فى سياق الجملة مثلا زى " العالمى " او شىء من هذا القبيل

المهم مش السحلمى هى المشكلة، الكوبرى الى بيتعمل دلوقتى هوه المشكلة!

" قلنا هنبنى وأدينا لسة بنبنى الكوبرى العااااااااااالى ....إخوانى !!"

صدقونى بحب بلدى جداً، لكن مستغرب مين الى بيفكر و يخطط و مين الى بينفذ وعلى انهى اساس و مين بيربط مين بأية وعشان أية !.
اولاً عندنا قصور رهيب فى تحديد وقت التنفيذ و كيفيتة و تأثيرة ...

منطقة حساسة زى شارع السودان الى بتربط شارع "فيصل" "السحلمى أوى " ايضاً والجامعة و الجيزة بالمهندسين فى منطقة كوبرى الخشب العالمى الملحمى بلاش السحلمى، كوبرى زى ده شل بياع المناديل الى كان بيسترزق مالاشارة دة لان الناس مبتبقاش طايقة دبانة تعدى من قصدا عينيها وهيا بقالها يومين "خللت"و "حمضت" فى العربية عشان تعدى "الملقف" ده

بس مش دية المشكلة !

حقيقى مشكلة الخنقة و اننا نروح بيتنا او نروح شغلنا و نتأخرساعة والا اتنين مش هية دية المشكلة، المشكلة لحد امتى هنبنى لورا، ايوة ؟ اية فايدة ان اننا نبنى كوبرى يشل الطريق لمده اريع سنين عشان ميفدش وينفذ غرضة لما يكمل فى النهاية ! ايوة بجد، بعد الاربع سنين دول الى بيتبنى فيهم فى كام مليون شخص سكنوا فى المناطق ية و كام مليون عربية جديدة نزلت البلد و كام و كام وكام ...

الحلول دية كلها مش حلول جذرية، عمرها ما هتخلى فيصل العظيم والا السودان الراهيب و شوارعهم رايقة زى اكتوبر من 8 سنين مثلاً، ده فيصل لغاية الساعة 3 بلليل واقف !
دانا متكلمتش على العيوب الى فى الشوارع دية و الحفر الى فى الطرق الرئيسية والا الدورانات الى متصممة غلط .. الخ..

انا بجد مش عارف اية نهاية ده ! و بعتقد ان الحكومة ليها دور اكبر من ان تبنى كبارى اصلاً !
اكبر من انها تتوسع لجوة تانى !

انها تشجع مشاريع زى ابنى ببيتك وغيطك و حديقتك و قصرك و ووو ولو اعطت الارض فعلا بسعر رمزى ! مهى اصلا اراضى فى الصحرا !، تاخد بس حق توصيل الخدمات ورصف الطرق المبدأى و تبتدى توجه الناس للاماكن دية، خليهم يخرجوا مالقمقم السحرى، هوه ده فعلا الحل ... التوازن، ازاى نصنع التوازن بين اقطار البلد و نوزع الكثافة السكانية بشكل منظم نوعاً ... هنلاقى الدنيا هديت وراقت بجد !

الدور كمان على الناس الى فهمة انها توجه عقلية الناس و تغيرها ! لية كل الشركات مصرة على انها تفتح مكاتب فى ازحمة ! فى التحرير و الدقى و مصر الجديدة !! الشىء الى خلى تمن المكتب اضعاف ما يستحق !! بجد مش هية دية الحياه يا ناس ! خلونا نخرج مالزحمة

والله اعلم !

» recent posts

� recent replies

» friends & links

2 COMMENT(S)

nz | 1/14/2010

اهنيك يامحمص على الموضوع وسوري , ولازم اقولك محمص مش محمد لان شكلك وقفت كتير تحت اشاعه الشمس الساحقة , وانت فتحت الموضوع بالسحلمي يمكن تكون جاية من الحلم الى بيتمتع بية كل المصريين على السحلب الى بيدفي فى الشتا مع انة شوية عجينة وكل بيشربه الغني يحط على لوز وجوز والفقير شوية سوداني ان وجد وفى الاخر الكل بيتدفى واخر سحلمية تقريبا من كائن السحلية كائن بيقولو انة كان فى يوم ديناصور لكن ظروف الحياة خليته سحلية ! طبعا مفيش وجة تشابه بين المواطن والسحلية , نرجع لشارع فيصل ولو لم اكن من فيصل لوددت ان اكون من 6 اكتور او 10 رمضان او 15 مايو او اي حاجة المهم فى اولها ارقام , لكن فيصل سيظل فيصل وان كنت مش عارف هو بيفصل بين اية واية ؟ لكن الى عارفه ان على اسم الملك فيصل والسلام , انهاردة بنحتفل ب 50 سنة على السد العالي , مع ان كل سد لازم يبقى عالي ومفيش سد واطي , المهم ان السد بيفكرنا بشركات السكر والحديد والالمونيوم وعمر افندي وغزل المحله وكل الشركات الكبيرة والغريبة ان كلها فى تاريخ قريب او .... اية دة كله خلينا فى شارع فيصل , الشارع اخر 1000 حاجة , ياريت تكبر شوية مكان الكومنت

mohammed | 1/14/2010

جزاكم الله خيرا، ما شاء الله مقالة مش تعليق، وجاتلى شكوى من حجم مكان التعليق و إن شاء الله اغيره قريبا بأذن الله، مشكور عالتعليق مرة تانية .

blogs.she7ata.com, mohammed shehata personal showcase and blogs website.

she7ata.com » blogs » articles » كوبرى شارع السودان السحلمى !ـ