في ناس في فيتنام… مش بت-نام! 😁
من فترة صغيرة كلمنى صديقى بالليل إن الهارد-ديسك بتاعة باظ، لسبب ما والويندوز إدالة رسالة إنة مش قادر يفهم الهارد إلا لما يفرمتة – المهم هوة “فرمتة” بالغلط والداتا الى علية كلها إتمسحت طبعاً فكلمنى عشان نرجع البيانات – فنصحتة ببرنامجين كان معايا منهم نسخة قديمة مجانية وبتعمل الموضوع دة بس انا كنت برة البيت – المهم – هوة نزل البرامج من الانرنت – بعدين البرنامج بعد بحث ساعات إحتاج يكون كامل عشان يقوم بعملية إعادة الملفات – قلتلة انا برة وكنا تقريباً قرب الفجر – وقلتلة لما اروح هبعتلك النسخة المجانية القديمة منة – بس هو منتظرش ونزل “كراك” للبرنامج و من هنا بدأت أحدث القصة في التسارع😁
“الكراك” بعد ما إشتغل بشوية حاجات غريبة حصلت للجهاز – والجهاز بدأت بتشفير كل شيء ومنها ملفات الشغل المهمة وطلعلة شاشة “الفيدية” الجميلة الى عايز منة 1000دولار عشان يرجع ملفاتة – دة غير طبعاً الله اعلم بالجهة الى هيبعتها وهل هياخد المبلغ دة بس والا إية!.
المهم، إتكلمنا وأتفقنا يجي عشان نشوف الموضوع التانى دة بالإضافة للهارد-ديسك الاصلى الى اتمسح من علية كل شيء!.
وهوة جاييلى الفايرس اللطيف قفل حساب “الفيس-بوك” من على المتصفح “كروم” – طبعاً الموضوع صعب بس إحنا كنا ضحك هيستريا على الاحداث ورا بعض. انا تخيلت نفسى بضحك زى الأستاذ مجدى شطة مع الأستاذ حلمى بكر 😁. – انا حسيت الابتلاء دة جى بالمنظور ثلاثى الابعاد دة بالقصد لصديقى الصدوق – المهم – بعديها بشوية جه لصديقى إيميل إفادة بمحاولات لدخول البريد بتاعة بتاع الشغل من اى-بى في فيتنام-الى-فيها-هاكرز-مش-بتنام 😁
بس انا قلت استغل الموقف وأقول كذا نصيحة كدة للزمن لعل ربنا ينفع بيها حد 🙏.
– أنظمة التشغيل سواء لموبايلك او جهاز الكمبيوتر بتيجى مع شوية إعدادات للحماية – بليز سيبها على الوضع القياسى الا لو كنت فاهم إنت بتعمل إية.
– أنظمة التشغيل بيها تطبيقات لحمايتك برضة بشكل ما زى “الفايروول” و “الانتى-فايرس” ياريت تعمل أبديت وتعمل مسح كل فترة طويلة وياريت متقفلهاش ابداً الا برضة لو كنت فاهم برضة إنت بتعمل إية.
– (دارون! القرصنة سرقة!) بلاش تحمل تطبيقات من الانترنت من مصادر مجهولة عموماً وبلاش “الكراكس” وال”كى-جن” وغيرها من “الوارز” و “الدارك-نت” عشان حاجات كتير – وطول عمر ال “باينريز” او البرامج ممكن “تتحقن” فايروسات أنواع مختلفة من البرامج الخبيثة الى أقل واحد فيهم هيستغل بس جهازك إنة يعمل ” مايننج/تعدين ” علية!.
– متقلقش مفيش فايروسات قابلة للتشغيل بشكل مباشر فى ملفات الصور والنصوص الصريحة!.
– متديش تصريح وتشغل برضة لبرمجيات سواء على الموبايل او الجهاز الى للبرامج معروفة المصدر وذات الثقة – البرامج دية كفيلة تحول تليفونك او جهازك لأجهزة تتبع او تنصت وإنت والا دريان – والى هيعمل كدة ممكن ميديش ليك اى مؤشر – سواء الى على الطرف التانى بنى-أدم او أداة أتمتة وروبوت متطور – أو جهة كاملة زى “الأخ الكبير” او “الأخ الصغير”!. ياريت كمان تشوف التصريحات الى البرامج دية بتحتاجها وتتحقق منها.
– مفيش حاجة إسمها أمان مطلق او “سيكيورد” هية أبواب كتير بنحاول نقفلها عشان نبقى في امان اكتر – لكن الذكى فية أذكى منة وفية ثغرات سعادة الانسان المشير – مثال مثلاً الكروم اهوة بكل ثقلة إدى الهاكر القدرة على تغيير حساب الفيسبوك عن طريق “السيشن” الى مفتوحة و ال”كوكيز” ويمكن “الهاشد” باسور وكلمات السر المحفوظة في المتصفح دور! فمتديش الامن للأخر.
– بمناسبة النقطة السابقة – لو الفيسبوك بتاعك/بتاع صديقك حصلة هاك فية طرق ترجعة حسب المرحلة الى وصلها لية الهاكر وكلها هتبقى متاحة لية من خلال الرابط دة facebook.com/hacked
– إستخدم فعلاً باسورد معقدة علاقل 8 خانات – بلاش تاريخ ميلادك ورقم تليفون الجيرل-فرند – خليها خليط من حروف كبيرة وصغيرة ورموز وأرقام ومتستسهلش.
– إستخدم مستخدم عادى على حسابك بلاش “أدمن” – الا لو إنت “ياسر جلال”. 😁
– الواى-فاى بتاع البيت خلي إسم الشبكة “مخفى” وخلى الاسم غريب عشان الناس متعرفش دة تباع مين – ونوع الشبكة خلية أمن – دلوقتى فية برامج بتعمل “سميوليشن” بنفس الاسم وبتعرف بعد فترة تجيب كلمات السر من خلال أجهزتك نفسها 😁 – ذي ما قولتلك الذكى فية أذكى منة!.
– بخصوص النقطة السابقة – لو حد هاكر دخل على شبكة البيت/الشغل ممكن يعمل “انتربت” او إعتراض لبعض الرسايل و”سنيفر” او “سبوفينج” للبيانات الى بتتحرك عالشبكة ومنها يحصل على بعض المعلومات والملفات حسب البروتوكول المتبع والتشفير طبعاً! – دة معناه برضة إن رجل الشبكات فى شركتكم الموقرة كمان يقدر يعرف كتير عن تصفحك! واخدلى بالك! 😁.
– أهتم بالخصوصية وبسرية البيانات الى بتتحط على الانترنت وعلى حدود ظهورها لمين في وسائل التواصل الاجتماعى الا لو كنت رامز جلال برضة 😁 – من فترة زوجة صديق تم محاولة إبتزازها بصور عشان تعمل شيء غلط – الذكاء الاصطناعى دلوقتى بيعمل صوت وصور كل حاجة.
– (أوقات) إبنك الصغير بينزل لعبة وبتاخد تصريح دخول لملفات وصور وكاميرا الهاتف والمايك! إنت ممكن تتخيل براحتك ممكن دة لية وممكن يؤدى لإية فبلاش.
– أضيف برامج تليفونك كأداة إضافية “توثيق/تو-واى-اوثينتيكيتور” للدخول على المواقع المهمة – انا عارف إنها خطوة رخمة والحياة قصيرة – بس ولاد الحلال مسابوش لولاد الحلال التانيين حاجة – إحنا كنا هاكرز زمان وتبنا بس كان عندنا ضمير عن كدة!. 😁
– شغلك وملفاتك المهمة إعملها تزامن على “الكلاود” او الانترنت – فية خدمات مجانية وتانية بفلوس حسب المساحة – بس متسيبش الدنيا كدة. إلا لو كنت شفيق جلال!.
أخيراً هية الدنيا مش سودا اوى زى ما البوست موضحها وربنا يسترنا ويحفظنا جميعاً – بس برضة مش بالسذاجة الى البعض متخيلها – إنت كدة كدة هتبقى ظاهر بدون ملابس أوى أمام واحد من الاسماء الكبيرة (جوجل/أبل/مايكروسوف/ميتا/واوى الخ) بس بلاش يبقى كمان العيال الصغيرة! 😁- ومفيش شيء إسمة سكيورتى بشكل تام – إحنا بس بنحاول ناخد بالاسباب ونحمى نفسنا قدر المستطاع – فلو مش فاهم في شيء بلاش تجازف اوى وخد بالاسباب لحماية نفسك وبيتك واسرتك. ومتنساش دايماً، فية ناس في فيتنام… مش-بت-نام! 😁